Aholi turmush darajasi to‘g‘risida tushuncha va statistikaning asosiy vazifalari. Har qanday jamiyatning asosiy maqsadi aholi turmush darajasini oshirishga qaratilgan bo‘ladi. O‘zbekistondagi ijtimoiy siyosatning bosh mezoni insonlarni rozi qilish, ularni moddiy va ma’naviy farovonligini ta’minlashga qaratilgan. Ijtimoiy statistikaga oid adabiyotlarda "aholi turmush darajasi" tushunchasining yagona ta’rifi mavjud emas. Uni tor va keng ma’noda tushunish mumkin: Tor ma’nodagi turmush darajasi - bu aholining zarur moddiy ne’matlar va xizmatlarni iste’mol qilishdagi erishilgan darajasi. Keng ma’nodagi esa jamiyatning yashashi uchun yaratilgan ijtimoiy-iqtisodiy sharoitlar majmuasidir.