Zamonaviy o‘zbek adabiyotining yorqin yulduzlaridan biri Erkin Vohidov hisoblanadi. Shoir badiiy mahorati o‘sib, kamol topgan, chuqur falsafiy umumlashmalar darajasiga ko‘tarilgan ijodkordir. Erkin Vohidovning ijod qilish davri XX asrning 60- yillaridan boshlangan. Shoir ijodi mavzulari rang-barangdir. Chunki ijodkor zamon bilan hamnafas ravishda ijod qilgan. Shoir lirikasi haqida fikr yuritar ekanmiz unda mustaqillik davridagi ijodi alohida ahamiyatga ega. Chunki davr o‘zgarishi bilan shoir ijodi ham mavzu, fikr, g‘oya jihatidan yangilanishga yuz burdi. Butun millat dunyoqarashida ijobiy o‘zgarishlar yuz bergan davrda Erkin Vohidov chinakam Vatan farzandi sifatida ijod qildi, ijtimoiy hayotda ham faol ishtirok etdi. “Shoir uchun el nazaridan qolish – eng oliy jazo. Qolganini iztirob demasa ham bo‘ladi” , - deb yozgandi muhtaram adibimiz. Erkin Vohidov butun umr qutlug‘ saodatni his qilib yashadi.