Mirtemir 1910-yilida Turkiston shahriga qarashli Iqon qishlog‘ida dunyoga keldi. Otasi dehqon va chorvador, ona tomondan bobosi mulla va maktabdor edi. Mirtemir 11 yoshida Toshkentga o‘qishga kirdi. U bilim yurtida o‘qib yurgan kezlarida she’riyatga qiziqib, 1926-yilda yoshlar gazetasida «Tanburim tovushi» degan dastlabki she’rini e’lon qildi. 1928-yilda uning nomini mashhur qilgan «Shu’lalar qo‘ynida» degan ilk she’rlar to‘plami nashr etildi. Mirtemir 1929-yilida Samarqanddagi Pedagogika akademiyasiga o‘qishga kiradi.