AD-AS modeli makroiqtisodiyotda muhim tushunchalardan biri hisoblanadi. Bu model orqali mamlakatdagi umumiy talab va umumiy taklif o‘rtasidagi o‘zaro bog‘liqlik tahlil qilinadi. Umumiy talab tushunchasi iqtisodiyotdagi barcha tovarlar va xizmatlarga bo‘lgan umumiy ehtiyojni ifodalaydi. Bu talab asosan to‘rt asosiy omildan tashkil topadi: iste’mol, investitsiyalar, davlat xarajatlari va sof eksport. Umumiy talab va taklif grafiklari yordamida iqtisodiy holat ko‘rsatib beriladi. Grafikda vertikal o‘qda narx darajasi, gorizontal o‘qda esa ishlab chiqarish hajmi ko‘rsatiladi. AD egri chizig‘i pasayuvchi bo‘lib, narxlar oshganda talab kamayishini bildiradi. AS egri chizig‘i esa narxlar va ishlab chiqarish hajmi o‘rtasidagi ijobiy bog‘liqlikni ko‘rsatadi. U dastlab gorizontal bo‘lib, keyinchalik tikka holga o‘tadi. Muvozanat nuqtasi esa umumiy talab va umumiy taklif chiziqlari kesishgan nuqtadir. Bu nuqtada iqtisodiyot muvozanat holatida bo‘ladi, ya’ni ishlab chiqarilgan mahsulot miqdori talab qilinayotgan mahsulot miqdoriga teng bo‘ladi. Agar talab yoki taklif o‘zgarsa, muvozanat nuqtasi ham o‘zgaradi. Shunday qilib, AD-AS modeli yordamida narxlar darajasi, ishlab chiqarish hajmi va iqtisodiy muvozanat tahlil qilinadi. Bu model siyosiy qarorlar qabul qilishda muhim vosita hisoblanadi.