Ko‘p qavatli sanoat binolari asosan karkas panelli qilib loyihalanadi va barpo etiladi. Bunday binolarning hajmiy-rejaviy yechimidagi ustunlar to‘rining o‘lchamlari 4,5x6; 6x6; 6x9; 6x12 va 9x12 m bo‘ladi. Qavatlar balandligi ishlab chiqarish zaruriyatiga bog‘liq holda, sezilarli doirada o‘zgarishi mumkin. Ustunlar o‘lchamlari 40x40sm dan 60x60sm gacha kvadrat kesimga ega yoki to‘g‘ri to‘rtburchak shaklida xuddi shunday yuzaga teng qilib ishlab chiqariladi. Rigellar - orayopma plitalari tokchasiga qo‘yiladigan binolarda balandligi 80 sm, eni 65 sm bo‘ladi.