Ўрта Осиё қўлда ясалган нақшли сополлар маданияти тарихий-маданий вилоятларда турлича номда аталиб келинмоқда. Уларга хос бўлган асосий хусусиятлардан бири қабрларнинг деярли учрамаслигидир. Зардуштийлик моддий маданияти туркумига кирувчи даҳмалар тарихшунослиги тадқиқотчилар томонидан олиб борилган бўлиб, ҳозирда Бақтрия, Суғдиёна ва Хоразм ҳудудларида “даҳма” лар аниқланган. Сурхондарё вилояти Шеробод тумани Пошхурд-Зарабоғ ботиғида олиб борилган археологик тадқиқотлар давомида Кучук I даврига оид янги суғорилиш райони аниқланган бўлиб, манзилгоҳлар билан биргаликда 220 та даҳма-қўрғон аниқланган. Даҳма-қўрғонлар диаметри 4-5 метрдан 15-17 метргача бўлган, баландлиги 1,4 метргача боради. Улар йирик ва ўрта кўламдаги тошлардан ясалган. Тош иншоотлар тагида лаҳад қайд этилмади. Тошлар материк қатлам устидан терилган ва кучук I ва кучук III даври сополлари ҳамда суяк парчалари аниқланди. Тадқиқотлар натижасида ушбу даҳма-қўрғонлар илк зардуштийлик характеридаги дафн иншоотлари эканлигини тасдиқлайдиган маълумотлар олинди.