XIX ásir til filosofiyasi insan oy-pikiri, sociallıq turmıs hám mádeniyat penen tıǵız baylanıslı bolǵan teoriyalıq taraw sıpatında til bilimi tariyxında ayrıqsha orın iyeleydi. Usı dáwirde tildi tek ǵana baylanıs quralı emes, al insan sanasın qáliplestiriwshi, jámiyettiń mádeniy hám ruwxıy rawajlanıwında áhmiyetli qural sıpatında qaraw baslanǵan. Tildiń insan pikirlewi, sociallıq turmıs hám jeke bayan etiw menen tıǵız baylanıslılıǵın izertlegen ilimpazlar XIX ásirde jańa ilimiy baǵdarlardı jaratqan, olardıń ideyaları zamanagóy lingvistika hám til biliminiń rawajlanıwına bekkem tiykar bolıp xızmet etken.