Darsning maqsadi: Qishloq xo‘jalik hayvonlari o‘sishini aniqlash usullari bilan tanishish, mutloq va nisbiy o‘sishni hisoblash usulini bilish hamda shu ma’lumotlar asosida hayvonlarni o‘sish ko‘rsatkichlarini taqqoslash natijasida aniq xulosalar qilish. Uslubiy qo‘llanmalar. Hayvonlarning o‘sishini o‘rganishda anatomiya, gistologiya, biokimyo va fiziologiya fanlari usullaridan foydalaniladi. Hayvonlar organizmida o‘sishni o‘rganish vaqti-vaqti bilan o‘tkaziladi. O‘sishni aniqlash uchun tug‘ilgandan keyin buzoqlar va toylarni 1, 2, 3, 6, 9, 12, 18, 24 oyligida keyin 6 oyda yoki bir yilda bir marta, cho‘chqalarni tug‘ilganida va 1, 2, 4, 6, 9 ,12, 18, 24 oyligida, qo‘zilarni tug‘ilganda va 1, 4, 12 hamda 24 oyligida tarozida tortib boriladi. Yirik hayvonlarni tortganda to 100 grammgacha, mayda hayvonlarni esa 1 grammgacha bo‘lgan og‘irligi ham hisobga olinadi. Bo‘g‘oz mollarni tuqqanidan keyin bir oy o‘tkazib, sog‘iladigan hayvonlarni sog‘ib olingandan keyin va ishchi hayvonlarni ishlagandan keyin dam berib tarozida tortiladi. O‘sishni o‘raganish uchun bir nechta usullardan foydalaniladi: -tarozida tortish usuli; -o‘lchamlar olish usuli; -tana sathini aniqlash usuli; -grafik tuzish usuli. Har xil turga mansub bo‘lgan (qoramol, cho‘chqa, qo‘y va boshqalar) hayvonlarni tug‘ilganidan ma’lum bir yoshgacha bo‘lgan tirik vaznining ko‘rsatkichlari ish daftariga quyidagi shartlar va natijalar asosida qabul qilinishini tavsiflaydi.