ISSIQLIK O’TKAZISH ASOSLARI Reja: Umumiy tushunchalarIssiqlik o’tkazishinig asosiy tenglamasiIssiqlik o’tkazuvchanlikIssiqlik nurlanishiKonvektiv issiqlik almashinish 7.1. Umumiy tushunchalarNeft va gazni qayta ishlash, neft kimyosi va sanoatning boshqa sohalarida issiqlik almashinish jarayonlaridan keng foydalaniladi. Masalan, neft va mazutni haydash, piroliz, katalitik kreking, riforming, gidrotozalash va moylarni tozalash kabi jarayonlarda turli issiqlik almashinish uskunalari ishlatiladi. Bir qator texnologik jarayonlarining yo’nalishi issiqlik energiyasining berilishi yoki uzatilishi natijasida ma’lum bir haroratga ega bo’lgan holatdagina yuz beradi. Tezligi issiqlikning berilishi yoki uzatilishi bilan bog’liq bo’lgan jarayonlar (isitish, sovitish, bug’latish, kondensasiyalash va hokazo) issiqlik almashinish jarayonlari deb yuritiladi. Har xil haroratga ega bo’lgan jismlarda issiqlik energiyasining biridan ikkinchisiga o’tishi issiqlik almashinish jarayoni deb ataladi. «Issiq» va «sovuq» jismlarning haroratlari o’rtasidagi farq issiqlik almashinishining harakatlantiruvchi kuchi hisoblanadi. Haroratlar farqi bo’lganda termodinamikaning ikkinchi qonuniga ko’ra issiqlik energiyasi harorati yuqori bo’lgan jismdan harorati past bo’lgan jismga o’z-o’zidan o’tadi. Jismlar o’rtasidagi issiqlik almashinishi erkin elektron, atom va molekulalarning o’zaro energiya almashinishi hisobiga sodir bo’ladi. Issiqlik almashinishida qatnashadigan jismlar issiqlik tashuvchi deb ataladi. Issiqlik tarqalishining uchta prinsipal turi bor: issiqlik o’tkazuvchanlik, konveksiya va issiqlikning nurlanishi.