Chotqol biosfera qo‘riqxonasi – O‘zbekistonning eng qadimiy va eng yirik qo‘riqxonalardan biri hisoblanib, 1947-yilda tashkil etilgan. Ushbu qo‘riqxona G‘arbiy Tyan-Shan tog‘ tizmasining janubiy-g‘arbiy etaklarida joylashgan bo‘lib, Toshkent viloyatining Bo‘stonliq, Parkent va Ohangaron tumanlarini qamrab oladi. Qo‘riqxona hududining relyefi, iqlimi va geologik tuzilmasi nihoyatda murakkab va xilma-xildir. Bu holat hududda o‘ziga xos, noyob ekotizimlar shakllanishiga sabab bo‘lgan. Ayniqsa, bu yerda uchraydigan endemik va relikt turlar Chotqol biosfera qo‘riqxonasining biologik va ilmiy ahamiyatini yanada oshiradi.