Ишлаб чиқариш - корхоналарнинг асосий фаолияти тури бўлиб, чекланган ресурслардан фойдаланган ҳолда амалга оширилади. Ишлаб чиқариладиган маҳсулот миқдори ушбу товарларни ишлаб чиқариш учун сарфланадиган ресурслар ҳажмидан ва ишлаб чиқаришда фойдаланилаётган технологиянинг ҳолати ва даражасига боғлиқдир. Микроиқтисодиётда ишлаб чиқариш омилларини йириклашган 6 гуруҳга бўлиб ўрганилади. Булар: ер, ишчи кучи, тадбиркорлик қобилияти, капитал, материаллар ва ахборот.