Xufyona iqtisodiyot yoki yashirin iqtisodiyot insoniyat jamiyatida davlat boshqaruvi shakllanishining dastlabki davrlaridan mavjud bo‘lib, bugungi kunda dunyoning barcha mamlakatlari uchun dolzarb muammoga aylangan. Xufyona iqtisodiyot qonun asosida man qilingan faoliyat turlari va rasmiy statistikada hisobga olinmagan har qanday iqtisodiy faoliyatni o‘z ichiga oladi. U qimor o‘yinlari, fohishabozlik, narkobiznes kabi noqonuniy iqtisodiy faoliyatlar bilan ham bog‘liq. Davlatning aralashuvi, soliq to‘lashdan bo‘yin tovlash va davlat boshqaruvi tizimidagi kamchiliklar xufyona iqtisodiyotning rivojlanish omillaridan biridir.