Inson hayotining ilk bosqichlari – bolalik davri shaxs kamoloti va barkamol avlodni shakllantirishda muhim o‘rin tutadi. Bu davrda bolaning tasavvuri, fikrlashi, nutqi va hissiy dunyosi jadal rivojlanadi. Shu sababli maktabgacha yoshdagi bolalarni har tomonlama rivojlantirishda turli tarbiyaviy-uslubiy vositalardan foydalanish muhim ahamiyatga ega. Shunday vositalardan biri – bu qo‘g‘irchoqlar, xususan, qo‘lqop qo‘g‘irchoqlaridir. Qo‘lqop qo‘g‘irchoqlari orqali olib boriladigan o‘yinlar va sahna ko‘rinishlari bolalarning nafaqat ko‘nglini ochadi, balki ular orqali bolalar axloqiy fazilatlarni anglaydi, til boyligini oshiradi, sahnadagi ifoda vositalarni rivojlantiradi.