Ijtimoiy psixologiya insonlar o‘rtasidagi munosabatlar, ularning guruhdagi xatti-harakatlari va qaror qabul qilish jarayonlarini o‘rganadi. Ushbu yo‘nalishda "guruh bosimi" va "konformlik" kabi hodisalar muhim o‘rin tutadi. Guruh bosimi insonning o‘z xatti-harakatlarini guruhning umumiy talablariga yoki me’yorlariga moslashtirishiga sabab bo‘ladigan jarayondir. Konformlik esa, insonning guruh me’yorlariga moslashish darajasini aks ettiruvchi psixologik holatdir. Mazkur mavzuning ahamiyati shundaki, guruh bosimi va konformlik hayotning deyarli barcha sohalarida – oilada, ta’limda, ish joylarida va hatto ijtimoiy tarmoqlarda ham namoyon bo‘ladi. Ushbu hodisalarni o‘rganish, insonlar o‘rtasidagi munosabatlarni tushunish va boshqarishda, shuningdek, ijtimoiy muammolarni hal etishda muhim ahamiyat kasb etadi.