Gulxaniy XVIII asrning oxiri, XIX asrning birinchi yarmida yashab ijod etgan o‘zbek mumtoz shoiri va yozuvchisidir. U XVIII asrning 70-yillarida tog‘lik Darvozda (Tojikistonda) kambag‘al oilada tug‘ilgan va badiiy ijod bilan shug‘ullanib, Qo‘qon adabiy muhitida e’tiborli o‘rin egallagan. Shoir ikki tilda (forsiy va turkiy), nazmda va nasrda ijod qilib, «Gulxaniy» va «Jurat» taxalluslarini qo‘llagan. Gulxaniydan bizgacha o‘zbek va tojik tillaridagi 12 g‘azali, Qo‘qon xoni Amir Umarxonga bag‘ishlangan 1 qasidasi va «Zarbulmasal» asari yetib kelgan.