Barcha tirik organizmlar hujayraning tuzilishiga ko‘ra ikkita katta guruhga bo‘linadi: yadrosiz organizmlar — prokariotlar va yadrolilar — eukariotlar. Prokariotlar guruhiga barcha bakteriyalar va ko‘k-yashil suv o‘tlari (siano bakteriyalar), eukariotlar guruhiga esa zamburug‘lar, o‘simlik va hayvonlar kiradi. Shunday qilib, hozirgi davrda hujayralar tuzilishiga ko‘ra ikkita sohaga ajratilgan va tegishli ravishda ikki yirik guruh: prokariot va eukariotlar deb ataladi. Prokariot hujayralarning xarakterli vakili sifatida bakteriyalarni misol qilib ko‘rsatish mumkin. Ular hamma joyda: suv, tuproq va ozuqa mahsulotlarida yashaydi.