Tirik organizmlar muhit bilan uzviy bog‘liqdir. Muhit sharoitlari doim o‘zgarib turadi va har qanday tirik organizm bu o‘zgarishlarga nisbatan ma’lum bir harakat bilan javob beradi. Agar organizmlar bu xususiyatga ega bo‘lmaganida, ular o‘zgargan muhit sharoitida yashay olmas edilar. Tirik organizmlarning muhit ta’sirlariga javob berish xususiyati ta’sirlanish deb ataladi. Ta’sirlanish organizmlarning o‘zgaruvchan muhit sharoitlariga moslashuviga va yashab qolishiga imkon beradi. Tirik organizmlarga ta’sir etuvchi muhit omillari ta’sirlovchilar deb ataladi.