Elektr hisoblagich — maʼlum vaqt oraligʻida sarflangan elektr energiyasini hisoblaydigan o‘lchash asbobi. Doimiy tok zanjirida magnitoelektrik, ferrodinamik, elektrolitik va elektrodinamik; o‘zgaruvchan tok zanjirida esa induksion (faol va reaktiv energiyani hisobga oladigan) turlari mavjud. Elektrolitik sistemadan boshqa barcha sistemalarda mikroelektr dvigatel ishlatilgani bois ular ko‘pincha “motorli” hisoblagich deb ataladi. O‘lchash natijasi kilovatt-soatlarda disk o‘qi va chervyakli uzatma orqali ko‘rsatiladi.