Sotsiologik metod, adabiyotning jamiyatdagi funksiyalari va siyosiy vaziyatga ta'sirini o'rganishda qo'llanadi. Tarixiy-madaniy maktab bilan sotsiologik metod orasidagi umumiy jihatlar quyidagilarda ko'rinadi: tarixiylik, individuallikka emas, jarayonga e'tibor va qiziqish; adabiyotni u yoki bu xalq moddiy madaniyati qonuniyatlarining ifodasi deb bilish; badiiy ijod va uning mahsulini boshqa fanlar, jumladan, sotsiologiya va iqtisodiyot qonuniyatlariga tayanib tushuntirishga moyillik; adabiyotning jamiyat hayoti va siyosiy vaziyatga ta'sirini o'rganishga e'tibor. Sotsiologik metodning asosiy prinsiplari: adabiyotni ijtimoiy ong hodisasi deb tushunish; adabiyotning jamiyatdagi funksiyalariga e'tibor; adabiy asar voqeligida ijtimoiy-tarixiy sharoit bilan bog'liq nuqtalarni ochishga harakat; badiiy ijodga iqtisodiy va siyosiy qonuniyatlar ta'sirini ochishga intilish; ijtimoiy muhit va ijtimoiy ruh-kayfiyat bilan uzviy bog'liq xarakterlarga ayricha qimmat va ahamiyat berish; individuallikka emas, ijtimoiy-tipik hodisalarga ko'proq qiziqish va qimmat berish; tipiklashtirishni badiiyatning muhim shartlaridan deb qarash.