553-555 yillarda turkiylar o‘z mulklarini g‘arbga tomon kengaytira boshlaydilar. Sarkarda Istemi Ili, Chu, Talas (Ettisuv) daryolari vodiylarini hamda Sharqiy Turkistonning ularga tutash yerlarini bo‘ysundiradi. Xusrav I Anushirvon podsholigi davrida sosoniylar eftaliylarga o‘lpon to‘lamay qo‘ygan edilar. Xusrav I va turkiylar eftaliylarni qulatish maqsadida o‘zaro ittifoq tuzadilar. 554-yili sosoniylar qo‘shini Toharistonga bostirib kiradi. Eftaliylar og‘ir ahvolda qoladilar. Shu paytda turkiylar Choch, Farg‘ona, Samarqand, Kesh va Naxshabni egallaydilar. Eftaliylar hukmdori Gatifar qo‘shin to‘playdi.