Gemolitik anemiyaning turli ko'rinishlarida eritrotsitlarning nobud bo'lishida retikuloendoteliya tizimining, ayniqsa, taloqning ahamiyati katta. Gemolitik anemiya irsiy va orttirilgan bo'ladi. Bolalarda ko'pincha irsiy ko'rinishda, nasldan-naslga o'tuvchi mikrosferotsitar gemolitik anemiya (Minkov-Shaffar kasalligi) kuzatiladi. Eritrotsitlarning shakli yumaloq bo'ladi (sferotsitoz). Eritrotsitlar shaklining bunday holati, membrana elastikligidagi muammolar, splenada, vena bosimida ularning turib qolishi hamda shu yerda yemirilishiga olib keladi. Bu kasallik oilaning bir necha vakilida uchrashi mumkin.