Даво ва диагностик мақсадда тўқима ва аъзоларга қилинувчи механик таъсир – операциялар хусусий тушунча. Илгари антисептика, анестезия ва инфекциядан муҳофаза услублари номаълум бўлган, фақат анатомик йўналишда ривожланган хирургия ҳозирги кунда физиологик ёндашувни қўллайди. Беморларни операцияга тайёрлаш, анестезия воситалари, қон қуйиш, жарроҳлик инфекциясидан ҳимоя қилиш ва операциядан кейинги интенсив кузатиш орқали муваффақиятли натижаларга эришилади. Оғриқни камайтириш ва аъзолар ҳолатини аниқ баҳолаш шароити ҳозирги замонавий хирургиянинг асосидир.