Ko‘rish burchagi qancha katta bo‘lsa, buyumning tasviri ham shuncha ravshan ko‘rinadi. Buyumni ko‘rish uchun eng qulay masofa eng yaxshi ko‘rish masofasi deb, ko‘zdan shu masofada turadigan nuqta esa akkomodatsiyaning eng yaqin nuqtasi deb ataladi. Normal ko‘z akkomodatsiyasining eng uzoq nuqtasi cheksiz uzoqlashgan nuqtadir. Bu nuqta ko‘zning zo‘riqmagan holatiga muvofiq keladi. Ko‘zning akkomodatsiya qobiliyati buyumlarning to‘r parda sirtiga proyeksiyalanishini ta’minlaydi. Normal ko‘z hech qanday zo‘riqishsiz, har qanday masofadagi buyumlarni eng kichik masofaga akkomodatsiya qila oladi, eng kichik akkomodatsiya masofasi 10 cm dan 22 cm gacha o‘zgarib turadi.