O‘tkir va doimiy salbiy taʼsirotlar (psixogen omillar) natijasida asab tizimi va ichki aʼzolarning faoliyati buziladi. Bosh va tananing turli joylarida og‘riqlar va funksional xususiyatga ega bo‘lgan boshqa patologik simptomlar paydo bo‘ladi. Asab tizimi funksional faoliyatining buzilishi bilan kechuvchi va organik xususiyatga ega bo‘lmagan nevrologik buzilishlarga psevdonevrologik sindromlar deb aytiladi. Ular nevrozlarning klinik ko‘rinishi sifatida ham o‘rganiladi. Maʼlumki, nevrozlarda nafaqat asab tizimi faoliyati, balki boshqa aʼzolarning ham faoliyati buziladi. Bu buzilishlar o‘tgan asrda (baʼzi mamlakatlarda hozir ham) «yurak nevrozi», «oshqozon nevrozi», «bo‘g‘im nevrozi» va shunga o‘xshash nomlar bilan atalgan. Keyinchalik ichki aʼzolar funksiyasining buzilishi bilan kechadigan funksional kasalliklar «psixosomatik kasalliklar» deb ataladi.