Жигар – одам организмидаги энг йирик без аъзо ҳисобланади. Вазни 1200-1500 г, тана вазнининг 1/50 қисмини ташкил қилади. Гепатоцитлар жигар вазнининг 90%, хажмининг 70% ташкил қилади. Ҳар бир миллиграмм жигар тўқимасида 202 000 та ҳужайра, ундан 172 000 гепатоцитлар, 30 000 строма ҳужайралари мавжуд. Гепатоцитлар кўп қиррали, думалоқ, тўрт бурчакли, катталиги 30 мкм ли ҳужайралар ҳисобланади. Гепатоцитлар хайвонлар жигарида 150 кун умр кўради. Жигар ҳужайралари жуфт-жуфт устунлар пайдо қилиб жойлашади, уларни иккала томонадан ҳам Диссе бўшлиғи ва синусоид эндотелийси ўраб туради. Синусоидлар эндотелийси орасида макрофаг хусусиятига эга бўлган Купффер ҳужайралари ўрин эгаллаган. Диссе бўшлиғида Ито ҳужайралари ёки липоцитлар жойлашган.