Inqilob — bu mavjud siyosiy, ijtimoiy yoki iqtisodiy tuzumni tubdan o‘zgartirishga qaratilgan keskin va ommaviy harakatdir. 18-asr oxirida Fransiyada chuqur siyosiy va iqtisodiy tanglik yuzaga kelgan edi. Qirol hokimiyatining cheklanmaganligi, aholining tengsizlik asosida tabaqalarga bo‘linishi, soliq yukining asosan oddiy xalq zimmasida bo‘lishi, mamlakat byudjetining tanazzulga uchrashi va non kabi asosiy mahsulotlarning narxi oshib ketishi xalqqa og‘ir bosim bo‘lib tushgan. Aynan shu omillar natijasida Fransiyada inqilobiy harakatlar boshlanadi. Fransuz inqilobi nafaqat Fransiya, balki butun Yevropa va jahon tarixiga katta ta’sir ko‘rsatgan. U ozodlik, tenglik va birodarlik g‘oyalarini ilgari surdi va ko‘plab davlatlarda demokratik islohotlarga yo‘l ochdi.