Kurs ishining dolzarbligi: Bugungi globallashuv va raqamli transformatsiya jarayonlarida ta’lim sohasiga qo‘yilayotgan talablar kundan-kunga ortib bormoqda. Xususan, tarix fanini o‘qitishda ilmiy-metodik va didaktik yondashuvlarning takomillashuvi zamonaviy ta’lim jarayonining ajralmas qismiga aylanmoqda. Tarix fani nafaqat o‘tmishni o‘rganish, balki yosh avlodni vatanparvarlik ruhida tarbiyalash, milliy g‘urur va o‘zlikni anglash tuyg‘ularini shakllantirishda muhim o‘rin tutadi. Tarix darslarini tashkil etishda o‘qituvchi o‘zi o‘rgatayotgan mavzuning tarixiy, siyosiy, ijtimoiy va madaniy kontekstini chuqur tahlil qilishi, dars mazmunini o‘quvchilarga tushunarli va qiziqarli shaklda yetkazish yo‘llarini puxta ishlab chiqishi kerak. Shu bilan birga, darsning har bir bosqichida didaktik tamoyillarga amal qilinishi zarur: ta’limning ilmiyligi, ongli va faol o‘zlashtirish, tizimlilik va izchillik, vizuallik, hayot bilan bog‘liqlik va boshqalar. Ushbu talablarga amal qilish darslarning samaradorligini oshirib, o‘quvchilarda tarixiy tafakkurni shakllantirishga xizmat qiladi. Ta’kidlash joizki, tarix darslari faqatgina fakt va sanalarni o‘rgatishga emas, balki o‘quvchilarni mantiqiy fikrlashga, sabab-oqibat aloqalarini tushunishga, tarixiy hodisalarni hozirgi zamon bilan solishtirishga o‘rgatadi. Buning uchun dars mazmuni ham nazariy, ham amaliy jihatdan boy bo‘lishi lozim. Shuningdek, tarix darslarida tarixiy hujjatlar, xaritalar, statistik ma’lumotlar, foto va videomateriallardan foydalanish, rolli o‘yinlar, bahs-munozaralar tashkil etish orqali o‘quvchilarni faol fikrlovchi subyektga aylantirish mumkin. Shu bois, tarix darslariga ilmiylik, metodik asoslanganlik, zamonaviy pedagogik yondashuvlar va didaktik talablar asosida yondashish – fanning mazmun va sifat jihatdan samaradorligini oshirishda muhim omildir. Har bir tarix darsida o‘quvchining tafakkurini rivojlantirish, mustaqil fikrlash va tahlil qilish ko‘nikmalarini shakllantirish uchun yangicha metodlardan foydalanish muhim ahamiyat kasb etadi. O‘zbekiston Respublikasi Prezidenti Shavkat Mirziyoyev ta’lim tizimidagi islohotlar haqida shunday deydi: “Zamonaviy fikrlaydigan, chuqur bilimga ega, mustaqil qaror qabul qila oladigan yoshlarni tarbiyalash – bizning strategik maqsadimizdir”